Во изминатите три дена, ЈП „Лајка“ – Скопје го реализираше „Лајка фест – повеќе од настан“, иницијатива насочена кон обединување на институциите, стручната јавност, граѓанските организации и граѓаните околу прашањето за бездомните кучиња и потребата од системски, хумани и долгорочни решенија.
Фестивалот започна со панел-дискусија во Собранието на Град Скопје, на која учествуваа претставници од Факултетот за ветеринарна медицина, Агенцијата за храна и ветеринарство, ЗЕЛС, невладини организации, прифатилишта, како и експерти од Загреб, Сараево и Шпанија. Тие разговараа за актуелната состојба, предизвиците во пракса и можните решенија базирани на европски искуства и модели.
Во текот на дискусијата биле отворени теми поврзани со одговорноста на институциите, координираното делување, улогата на локалната самоуправа, значењето на стерилизацијата, одговорното сопствеништво, како и потребата од едукација и зголемување на јавната свест. Посебен акцент бил ставен на фактот дека проблемот со бездомните кучиња најчесто започнува со неодговорно сопствеништво, напуштање и неконтролирано размножување.
Во продолжение, во наредните два дена, Градскиот парк бил претворен во простор за дружење, едукација, вдомување и интеракција меѓу граѓаните и животните. Преку забавно-едукативниот дел од фестивалот, темата била доближена до јавноста на поинаков и интерактивен начин.
Во активностите учествувале над 50 пријавени учесници, голем број посетители, повеќе од 20 спонзори и партнери, како и претставници на невладини организации. Посетителите имале можност да се запознаат со кучињата од ЈП „Лајка“, да разговараат со вработените, ветеринарите и дресерите, како и да учествуваат во едукативни содржини и активности посветени на одговорното сопствеништво.
Од претпријатието посочуваат дека особено значајно било присуството на голем број семејства, деца и сопственици на миленици, што, како што велат, покажува растечка свест за потребата од похумано и поодговорно општество.
„Лајка фест“ не бил само настан за љубители на животни, туку и обид преку соработка, едукација и заедништво да се отвори поинаков пристап кон проблемот со бездомните кучиња – пристап кој решенијата ги гледа во систем, одговорност и долгорочна промена, а не во насилство и поделби.
ЈП „Лајка“ упатува благодарност до сите институции, организации, експерти, спонзори, волонтери и граѓани кои придонеле за реализацијата на настанот и испраќањето порака дека промените се можни со заедничка волја.