Екипите на Корисничкиот енерго центар на Електродистрибуција во Штип, во координација со специјализираниот Тим за откривање на неовластено користење на електрична енергија, открија случај на кражба на електрична енергија во сервис за возила на улица Железничка во Штип.
Нелегалното користење на електрична енергија е утврдено дека се одвивало во периодот од јануари до почеток на мај 2026 година.
Контролните екипи на терен ја констатирале следната состојба на мерното место во објектот:
• Противправно користење на електрична енергија преку трифазно броило во мерен ормар. • Скинати пломби и премостување на проводници на една фаза за влез и излез на броилото.
Веднаш по утврдувањето на прекршокот, надлежните служби од Електродистрибуција ги презедоа сите соодветни законски мерки.
• Составен е Записник за неовластено користење. • Поднесена е Пријава за неовластено преземање на електрична енергија до МВР според член 235-а од КЗ. • Изготвена е Фактура за надомест на штета во износ од 150.610,00 денари.
Случајот е веќе процесуиран до Министерството за внатрешни работи за понатамошно постапување.