Министерот за внатрешни работи Панче Тошковски и градоначалникот на Скопје, Орце Ѓорѓиевски, денеска ги координираа финалните подготовки за пуштање во функција на системот „Safe City“. Проектот треба да донесе поголема дисциплина на улиците и заштита на јавниот имот.
Воведуваме ред, безбедност и модерен сообраќај – градот Скопје ќе има клучна улога во Сејф Сити системот, истакна Ѓорѓиевски.
Денес одржавме значаен координативен состанок со министерот за внатрешни работи, Панче Тошковски, како и со експерти од областа на сообраќајот, посветен на финалните подготовки за официјалното пуштање во функција на Сејф Сити системот, посочи Ѓорѓиевски.
„Градот Скопје ќе има силна и активна улога во неговата имплементација, со цел воспоставување ред, дисциплина и многу повисоко ниво на безбедност за сите учесници во сообраќајот.
Ова е суштинска реформа во начинот на кој функционира сообраќајот во нашиот град.
Наместо застарениот концепт на „зелен бран“ од минатото, воведуваме паметен зелен бран – модерен, адаптивен и иновативен систем кој во реално време ќе го регулира протокот на возила, ќе ги намали гужвите и ќе овозможи побрзо, поефикасно и побезбедно движење низ Скопје.
Во наредниот период, Советот на град Скопје ќе донесе низа важни одлуки поврзани со дистрибуцијата, особено во централното градско подрачје.
Овие мерки ќе донесат значително олеснување на сообраќајниот метеж, подобра организација и поголем комфор за граѓаните“, рече Ѓорѓиевски.
Ѓорѓиевски нагласи дека дополнително, преку Сејф Сити системот ќе се стави крај на девијантното и неодговорно однесување кое со години наназад го нарушуваше јавниот ред и резултираше со уништување на урбаната опрема и јавниот простор.
„Контролата, превенцијата и брзата реакција ќе станат стандард.
Ова ќе значи побезбедни улици, почитување на правилата, заштита на јавниот имот и пред сè, сигурност за секој граѓанин. Скопје чекори кон модерен европски град со паметни решенија, јасни правила и одговорен сообраќај.
Воведуваме ред.
Ја зголемуваме безбедноста.
Го градиме Скопје како современ и функционален град за сите“, потенцираше Ѓорѓиевски.