Собранието на Македонија денеска со 81 глас „ЗА“ ги донесе клучните измени на Законот за прекршоци, со што и официјално се отвора патот за целосно ставање во функција на системот „Safe City“. И покрај противењето на пратениците од СДСМ и ДУИ, законот помина по скратена постапка, што значи дека наскоро сообраќајните прекршоци ќе се санкционираат автоматски преку камерите.
Со овој потег, системот кој со години беше само најава, конечно ќе почне да испорачува казни на домашна адреса за сите оние кои поминуваат на црвено, возат брзо или се паркираат на недозволени места. Првично ќе бидат опфатени поголемите градови каде опремата е веќе инсталирана, а планот е мрежата да се прошири низ целата држава.