Градоначалникот на општина Битола, Тони Коњановски, на денешната прес-конференција го презентираше сублиматот од сработеното во првата година од неговиот мандат. Тој посочи дека и покрај затечените проблеми, општината бележи напредок преку реализација на бројни капитални и инфраструктурни проекти.
Според Коњановски, во изминатиот период се обезбедени 81 проект од владините повици преку унгарскиот кредит, со кои се опфатени над 10 километри обновена и новоизградена патна инфраструктура во градот и населените места. Дополнително, реализирани се инвестиции во водоводната и канализационата мрежа од над 3 километри, изградени се 220 нови паркинг места, а во тек е и реконструирање на спортски терени и сали.
Во делот на заштитата на децата и образованието, градоначалникот го истакна проширувањето на капацитетите во детските градинки, како и проектот за изградба на ново училиште во населбата Буковски Ливади вредно над 31 милион денари.
Покрај сите предизвици со кои се соочуваме како од демографска така и од инфраструктурна природа продолжуваме да инвестираме за нашата иднина. Затоа работиме и на проектот којшто го ветивме за изградба на училиште во населбата Буковски ливади со комплетна опременост соодветна за воспитно-образовната институција за што инвестираме над 31 милион денари – истакна Коњановски.
Тој направи преглед и на инвестициите во спортот и културата, издвојувајќи ги проектите за реконструкција на поранешната боксерска сала, адаптацијата на Киното „Партизан“ во мултинаменски објект со инвестиција од 96 милиони денари, како и планираното проширување на велосипедистката мрежа.
Во однос на социјалната заштита и противпожарната заштита, општината издвои 14,6 милиони денари за ранливите категории, а се интензивираат и работите на новата противпожарна зграда во поранешната касарна, која во втората фаза ќе биде поддржана со грант од 1 милион долари од Министерството за одбрана на САД.
Ова не е дневна политика и популизам, туку континуирана и стратешка заложба на тим со јасна цел и визија, силна мотивираност и посветеност, насоченост, работа на проектна документација и работа на терен – порача градоначалникот на Битола.