Претставници на сестрински социјалдемократски партии од регионот и Европа вчера на 32. програмски конгрес на СДСМ во Скопје изразија поддршка за партијата, упатувајќи пораки за продолжување на европскиот пат на државата, зајакнување на демократијата, владеење на правото и борба против корупцијата.
Од името на Социјалдемократската партија на Хрватска (СДП), Марко Кричка истакна дека социјалдемократските партии се дел од заедничко европско семејство и дека искуствата од регионот можат да помогнат во процесот на европска интеграција.
Тој нагласи дека станува збор за сложен процес и дека е важно да се избегнат грешките од минатото, посочувајќи дека СДП и СДСМ ги поврзува не само регионална, туку и европска социјалдемократска приказна.
Претседателот на Демократската странка на Србија, Срѓан Миливојевиќ, порача дека иднината на регионот зависи од борбата против корупцијата и враќањето на политиката во служба на граѓаните.
Од Демократската партија на социјалистите (ДПС) на Црна Гора, Јасмин Бојаџиќ нагласи дека Северна Македонија и Црна Гора ги поврзуваат заеднички евроатлантски цели, оценувајќи дека членството во НАТО претставува клучен безбедносен фактор за регионот.
Иван Вујовиќ од Социјалдемократската партија на Црна Гора порача дека земјите од Западен Балкан припаѓаат во европското семејство, додавајќи дека Северна Македонија има потенцијал да стане стабилна и развиена европска држава.
Бојан Костреш од Лигата на социјалдемократите на Војводина оцени дека политичката борба продолжува со јасна европска ориентација, додека претставникот на Социјалдемократите од Шведска, Маркус Олави Каупинен, истакна дека политиките треба да бидат насочени кон решавање на секојдневните проблеми на граѓаните и зајакнување на социјалната сигурност.
Заедничка порака на учесниците на конгресот беше дека Северна Македонија припаѓа во Европската Унија, а европската иднина на државата зависи од јакнењето на институциите, владеењето на правото и ефикасната борба против корупцијата.