Предлог-измените на Законот за данокот на додадена вредност денеска во второ читање ќе се најдат пред членовите на собраниската Комисија за финансирање и буџет.
Со предложените измени се предвидува бришење на ослободувањето од ДДВ за увоз на пратки со мала вредност (до 22 евра) испорачани од странство кон приматели во земјата. Наместо тоа, ќе се воведе ново ослободување – но само за мали, некомерцијални пратки испратени од физичко лице до физичко лице, чија вредност не надминува 22 евра. Ова ослободување нема да важи за алкохол и алкохолни пијалаци, парфеми, тоалетни води, како и за тутун и преработки од тутун.
На дневен ред е и Предлог-законот за претворање на побарувањата на државата по основ на јавни давачки во траен влог во Јавното претпријатие за стопанисување со спортските објекти во државна сопственост – Скопје, исто така во второ читање.