Фондот за здравствено осигурување (ФЗО) активно бара техничко решение за надминување на проблемите со исплатата на надоместокот за породилно отсуство. Според директорот на Фондот, Сашо Клековски, дел од кочниците се појавуваат кај помалите фирми кои прават грешки при административното пријавување на родилките.
Клековски, кој денеска престојуваше во Прилеп, појасни дека често не се прави разлика помеѓу пријавувањето на патолошка бременост и редовно породилно отсуство, каде што процентите на исплата и процедурите се различни.
Грешки во пријавувањето од страна на фирмите
Директорот на ФЗО посочи дека само во текот на овој месец се регистрирани десетина вакви случаи по поднесени жалби од граѓани.
„Бараме техничко решение како тоа да се надмине, меѓутоа за разлика од другите исплати, овие се фреквентно променливи и некогаш процесите не се следат соодветно. Дел од проблемите што настануваат се, посебно од помалите фирми кои не прават разлика помеѓу пријавувањето на патолошка бременост и на породилен надомест. Разликата е во тоа што за едните надоместот е 70, а за другите е 100 проценти. А за тоа мора да се поднесе ново барање. Само овој месец имавме 10-тина случаи на жалби и констатиравме дека е побаран надомест за патолошка бременост, а не е испратен документ дека родилката е на породилно отсуство. Работиме на тоа, ние постојано се извинуваме за непријатностите, меѓутоа се трудиме да најдеме техничко решение за да го олесниме процесот и на пријавување и на исплата“, објаснува Клековски.
Рачна верификација на почетокот и крајот на боледувањето
Дополнителен предизвик за брза исплата претставува и самиот систем, особено за првиот и за последниот месец од породилното отсуство, каде што проверките сè уште се вршат рачно во подрачните служби.
„Во основа, подрачните служби ги верификуваат породилните отсуства, ги испраќаат во дирекцијата во Скопје каде што се исплаќаат боледувањата. Ние, како што пристигнуваат породилните и другите долги боледувања, така ги исплаќаме. Само минатиот месец имаме исплатено 511 милиони денари за боледувања. Минатата година исплативме 72 милиони евра за породилни боледувања. Бараме техничко решение како тоа да се надмине, меѓутоа за разлика од други исплати, овие се фреквентно, променливи исплати и некогаш процесите не се следат соодветно“, вели Клековски.
Овие информации првиот човек на ФЗО ги соопшти за време на промоцијата на нова медицинска опрема во болницата во Прилеп.а време на промоцијата на нова медицинска опрема во болницата во Прилеп.