Тројца актуелни или поранешни директори на јавни здравствени установи вратиле вкупно 1,5 милион денари во буџетот, откако било утврдено дека средствата ги зеле врз основа на неправилна пресметка на нивните плати. Секој од нив вратил по 500.000 денари, соопшти денеска генералниот директор на Фондот за здравствено осигурување (ФЗО), Сашо Клековски.
Клековски нагласи дека Фондот, покрај медицинската, континуирано спроведува и строга финансиска контрола на работењето на установите.
„Во три случаи актуелни или поранешни директори ги вратија погрешно пресметаните приходи од речиси еден и пол милион денари“, изјави Клековски.
Тој беше дециден дека ваквите појави на „самовреднување и самонаплата“ се недозволиви. Според него, Фондот ќе инсистира на воспоставување на фер правила кои мора да се почитуваат од сите чинители во системот. Директорот на ФЗО додаде дека со овој потег се испраќа јасна порака дека злоупотребите со додатоците на плати, кои во минатото биле пракса, нема да бидат толерирани.