„Сакам да му го честитам роденденот на мојот починат син, да видат обвинетите како ние ги прославуваме ‘најсреќните’ денови“. Ова вчера го кажа Мита Тасева, мајка на загинатиот диџеј Стефан Тасев, додека траеше судењето за трагедијата во дискотеката „Пулс“ во Кочани.
Драги Стојанов, татко на загинатиот Андреј Стојанов се надоврза: – „Утре е роденден на ова златно, прекрасно дете. Ако контролираа, утре немаше на гробови да славам роденден“.
Во судницата во Идризово, при Основниот кривичен суд Скопје, денеска продолжува судењето за пожарот во дискотеката „Пулс“ во Кочани, во кој загинаа 63 лица, а повеќе од 200 беа повредени.
На денешното рочиште треба да биде изведено градежното вештачење, изработено од тим од Градежниот факултет при УКИМ, по што ќе бидат сослушани и вештите лица кои го изработиле. Со тоа, како што е најавено, треба да заврши изведувањето на доказите од страна на Обвинителството, по што одбраната ќе започне со изведување свои докази.
Случајот го води судијката Дијана Груевска-Илиевска, а обвинението го застапува тим од 15 јавни обвинители.