Поради учество во забранет договор и усогласено однесување, четири трговски друштва кои продаваат храна на мало и Сојузот на стопански комори (ССК) заработија прекршочни санкции од Комисијата за заштита на конкуренцијата (КЗК).
Утврдено е дека тие се договориле да не прифаќаат нови или зголемени ценовници од добавувачите, со што ја нарушиле пазарната конкуренција.
Со решението на КЗК, на секој од четирите маркети му е изречена глоба од 3.075.000 денари, додека ССК како координатор ќе плати 1.143.000 денари.
„Во постапката е утврдено дека на состанок одржан на 5 февруари 2025 година учесниците постигнале усогласен став за неприфаќање нови или зголемени ценовници од добавувачите, со што ја замениле состојбата на независно пазарно однесување со состојба на практична координација. Овој вид на однесување по својата природа претставува т.н. „by object“ ограничување на конкуренцијата, кое е забрането без потреба од дополнително докажување на пазарни ефекти“, соопшти КЗК.