Општина Карпош привремено ги исклучи четирите фонтани на својата територија, како превентивна мерка во насока на спречување на ширењето на вирусот на Западно-нилска треска.
Исклучени се фонтаните во Бардовци, спроти студентскиот дом „Гоце Делчев“, на плоштадот „Делфина“ во Влае и во Карпош 3, спроти „Тинекс“.
Од Општината велат дека мерката е преземена со цел да се спречат услови за појава и размножување на ларви и комарци, кои можат да пренесуваат вирусни заболувања.
Од локалната самоуправа апелираат до граѓаните да имаат разбирање за одлуката и да ги почитуваат препораките на Институтот за јавно здравје.
„Оваа мерка ја преземаме во интерес на безбедноста и здравјето на сите жители“, наведуваат од Општина Карпош.