Најмалку 20 лица, меѓу кои и 10 деца, загинаа, а уште 10 се водат како исчезнати во катастрофалните поплави што го зафатија јужниот дел на Хаити, предизвикани од ураганот Мелиса, соопштија локалните власти.
Според Службата за цивилна заштита на Хаити, во тек е потрага по исчезнатите жители, откако една од локалните реки се излеала од коритото и однела повеќе куќи.
Ураганот Мелиса е најсилниот што ја погодил областа во последните деведесет години. Вчера помина низ Јамајка, а денеска ги зафати и бреговите на Куба, каде, според претседателот Мигел Дијас-Канел, има „значителни штети“.
Досега, вкупниот број на жртви во Јамајка, Доминиканската Република, Панама и Хаити изнесува најмалку 30 лица.
Претставници на Обединетите нации соопштија дека разурнувањата во Јамајка достигнуваат „невидени размери“, при што се пријавени огромни штети врз инфраструктурата, патиштата, телекомуникациската и енергетската мрежа.
– „Првичните процени покажуваат дека повеќе од еден милион луѓе се погодени од ураганот“, изјавија координаторите на ОН за регионот на Карибите.