Каракачанов „омилен“ кај Бугарите во Македонија - освои 96 гласа
Партијата на поранешниот бугарски вицепремиер и министер за одбрана Красимир Каракачанов не освои ниту едно пратеничко место и на повторените избори во Бугарија.
Коалицијата Бугарски патриоти која е предводена од ВМРО-БНД на Каракачанов, на вчерашните парламентарни избори во Бугарија освои 3,2 отсто од гласовите и не успеа да го надмине прагот од 4 отсто за влез во парламентот.
Коалицијата на Каракачанов лошо помина и на гласањето во дијаспората, освен во Македонија, каде што победи убедливо со 37,21 отсто. Сепак, тоа се само 96 гласа, според првичните неофицијални резултати на бугарската Централна изборна комисија.
Второпласирана на гласањето во Македонија е ГЕРБ на Борисов со 24,03 отсто, или 62 гласа. Партијата Има таков народ на Слави Трифонов, која победи убедливо речиси секаде во дијаспората, во Македонија освои само 8,53 отсто, или 22 гласа.
И повторените парламентарни избори во Бугарија вчера не успеаја да донесат јасен победник, па повторно ќе оди тешко формирање влада.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
