Новогодишната ноќ во Македонија ќе помине во знак на ведро, но многу студено време, најавува метеорологот Славчо Попоски во својата најнова анализа. Според неговите предвидувања, територијата на земјата ќе биде под влијание на многу ладна и сува воздушна маса од север, што ќе услови температури под нулата во целата држава.
Попоски истакнува дека врнежи од снег не се очекуваат, но граѓаните треба да се подготват за ниски температури кои ќе се движат од -10 до -3 степени. На повисоките места и на планините, термометарот може да се спушти и под -10 степени.
Во Скопје и околината за време на најлудата ноќ се очекува температурата да достигне до околу -5 или -6 степени. Ваквото суво и студено време ќе се задржи и на 1 јануари, што значи дека во новата 2026 година влегуваме со стабилна, но многу ладна атмосфера.