Во Скопје денеска започнува втората годишна научна конференција посветена на геријатриската и палијативната медицина, која ќе се одржува во текот на два дена под мотото „Синдроми и симптоми во геријатрија и палијатива“.
Настанот е во организација на ЈЗУ Специјализирана болница за геријатриска и палијативна медицина „13 Ноември – Скопје“, а главниот фокус ќе биде ставен на подобрување на третманот и справувањето со најчестите синдроми и симптоми кај повозрасните и пациентите на кои им е потребна палијативна грижа.
Конференцијата има за цел да поттикне размена на стручни знаења и искуства меѓу здравствените работници од различни области, со акцент на мултидисциплинарниот пристап во лекувањето и негата на пациентите.
Во работата ќе бидат вклучени лекари од различни специјалности, медицински сестри, психолози, социјални работници и физиотерапевти, кои заеднички учествуваат во грижата за геријатриските и палијативните пациенти.
Преку стручни дискусии и размена на искуства, организаторите очекуваат конференцијата да придонесе за унапредување на квалитетот на здравствената заштита и подобра координација меѓу професионалците кои се грижат за оваа категорија пациенти.