Министерот за дигитална трансформација, Стефан Андоновски, денеска ќе учествува на панел-дискусијата „Предуслови и предизвици за забрзана дигитализација на приватниот сектор“, која ќе се одржи во просториите на ИНОФЕИТ ЕДИХ при Факултетот за електротехника и информациски технологии (ФЕИТ) во Скопје.
На дискусијата ќе се разговара за националните политики и мерки за поддршка на дигитализацијата, достапните финансиски инструменти и можностите за забрзување на дигиталната трансформација на македонските компании.
Настанот има цел да ги обедини претставниците на институциите, деловните организации, финансиските институции и експертите кои работат на унапредување на дигитализацијата, со акцент на поддршката за компаниите, можностите за финансирање и следните чекори во процесот на дигитална трансформација.
На почетокот на настанот ќе се обратат деканот на ФЕИТ, Владимир Атанасовски, и амбасадорот на Швајцарија во земјава, Кристоф Зомер.
Покрај министерот Андоновски, на панел-дискусијата ќе учествуваат и директорот на ИНОФЕИТ ЕДИХ, Димитар Ташковски, претседателот на МАСИТ, Јордан Димитровски, главната извршна директорка на „ГоДигитал“, Никица Мојсовска-Блажевски, и главната извршна директорка на Развојната банка, Ефимија Димовска. Дискусијата ќе ја модерира Горан Дамовски, директор на Швајцарската програма за зголемување на пазарната вработливост – ИМЕ.
Во рамки на настанот ќе бидат презентирани и решенија развиени во ИНОФЕИТ ЕДИХ. Учесниците ќе дискутираат за националните политики за дигитализација, улогата на технолошките и иновациските центри, придонесот на ИКТ-секторот и финансиските инструменти што им се достапни на компаниите.