ЈСП Скопје, со поддршка од Град Скопје и во соработка со Универзитетот „Св. Кирил и Методиј“ – Скопје (УКИМ), започнува со воведување на дигитална студентска превозна картичка за користење на бесплатниот јавен превоз. Оваа новина ќе се имплементира за студентите на државните универзитети во Скопје, вклучително и Универзитетот „Мајка Тереза“ – Скопје.
Процесот ќе се одвива целосно дигитално, преку автоматска синхронизација на податоците меѓу претпријатието и универзитетите, што значи дека нема потреба од доставување хартиени потврди или посета на билетарите за заверка на студентскиот статус.
Студентите ќе добијат насоки на својата електронска пошта, по што преку мобилната апликација SkopjeBus ќе можат да ја активираат и користат дигиталната картичка. При најавувањето во апликацијата потребно е да се користи истиот e-mail што бил пријавен при регистрацијата на универзитетот. Картичката ќе содржи QR-код кој ќе се користи за валидација при патување, а надлежните најавуваат навремени информации за целосниот процес на активирање.