Министерката за образование и наука, Весна Јаневска, денеска одговори на прашањата за случаите каде студенти ги продаваат ваучерите за набавка на електронски уреди, наместо да ги користат за наменетата цел.
Јаневска истакна дека проектот е ветено и реализирано право за студентите, но дека Министерството не може да се справи со нивното индивидуално одлучување.
„Има досетливи студенти кои на разно разни начини се обидуваат некако да си го олеснат животот. Ние со тоа не можеме да се справиме… Останува на нивната совест и свест да одлучат што ќе направат со ваучерите“, одговори министерката.
Јаневска потсети дека 55 илјади студенти ќе добијат по 15.300 денари за набавка на електронски уреди. Повикот е објавен на порталот uslugi.gov.mk, а аплицирањето трае најдоцна до 20.12.2025 година.
Министерката ги повика студентите да аплицираат и да го остварат своето право.