Министерката за образование и наука, проф. д-р Весна Јаневска, денеска ја посети општина Свети Николе каде заедно со градоначалникот Дејан Владев изврши увид во инфраструктурните зафати за подобрување на условите за настава.
Инвестицискиот циклус тежок околу 13 милиони денари опфаќа поставување фотоволтаици во три основни училишта и две градинки, уредување на дел од дворните површини, како и целосна замена на фасадата и кровот во средното училиште. Средствата се обезбедени од Владата преку јавниот повик за финансирање капитални општински проекти.
„Драго ми е што локалната самоуправа во континуитет се труди да гради поквалитетно образование на локално ниво, а тоа е идентична цел и на Владата и Министерството за образование и наука на национално ниво. Кога целите се идентични, заложбите се многу поефективни“, порача Јаневска.