Министерката за образование и наука Весна Јаневска денеска ќе изврши увид во градежните активности за целосната реконструкција на државниот студентски дом „Стив Наумов“ во скопската населба Автокоманда.
Според најавите од Министерството за образование и наука, реконструкцијата на домовите „Стив Наумов“ и „Кузман Јосифовски-Питу“ е во завршна фаза, а од академската 2026/2027 година се очекува студентите повторно да бидат сместени во обновените капацитети.
Јаневска на крајот на март изјави дека од 1 октомври очекува студентите да се вселат во реновираните домови, а најави и почеток на реконструкција и на останатите студентски домови низ државата.
Проектот за обнова на студентските домови се реализира со заем од Германската развојна банка и грант преку Програмата за регионална енергетска ефикасност за Западен Балкан на Европската Унија. Во план е темелна реконструкција на девет државни студентски домови во Скопје, Прилеп, Битола, Штип и Охрид.
Реконструкцијата се спроведува во рамки на проектот за енергетски ефикасна рехабилитација на студентските домови и ќе се реализира во повеќе фази. Градежните активности на домовите „Стив Наумов“ и „Кузман Јосифовски-Питу“ ги изведува компанијата „Страбаг АГ“.