Министерката за образование и наука, Весна Јаневска, денеска најави нови мерки за зајакнување на безбедноста во училиштата, со посебен фокус на враќање на дежурствата на наставниот кадар во училишните простории и дворови.
Јаневска посочи дека иако некои училишта веќе ја применуваат оваа пракса, таа наскоро ќе стане задолжителна за сите, со цел подобра контрола и воспитување на учениците.
„Подготвивме неколку прирачници и упатства кои се дистрибуирани до самите училишта и до општините. Вчера веќе најавив дека ќе бидат задолжителни дежурствата на наставниците во училиштата – како во ходниците, така и во училишниот двор. Факт е дека тоа во некои училишта постои, но во голем број училишта сè уште не постои“, изјави министерката во Аеродром.
Според неа, ангажирањето на приватно обезбедување кое чини милиони денари не го дава посакуваниот воспитен ефект, за разлика од директниот ангажман на наставниците.
„Во минатото, наставниците го правеа тоа и имаше подобро воспитување на децата, отколку да ги трошиме парите на некој кој не е вклучен во образовниот процес. Тие што се вклучени во образовниот процес – наставниците, стручната служба, но секако и родителите – треба да помогнат во воспитувањето на децата“, нагласи Јаневска.
Министерката упати и апел до родителите за поголема соработка со училишниот кадар, посочувајќи дека авторитетот на наставникот мора да се почитува за да се постигне безбедна средина.
„Дел од родителите, свесно или несвесно, не ги прифаќаат сугестиите на наставниците. Се докажува дека тоа е погрешно – малку повеќе почит кон наставниците и полека ќе се средат работите“, заклучи таа.