Министерката за образование и наука Весна Јаневска и шефот на Мисијата на ОБСЕ во Скопје, Килијан Вал, денеска им доделија сертификати на 50 наставници од основните училишта кои учествуваа на работилница за креирање забавни ученички активности кои поттикнуваат заедништво и почитување на различностите.
Работилницата, организирана во соработка меѓу МОН и ОБСЕ, на просветните работници им овозможи нови практични алатки за создавање поинклузивни, побезбедни и поподдржувачки училишни средини.
Министерката Јаневска истакна дека образованието има клучна улога во градењето доверба и соживот, посочувајќи ги наставниците како клучни сојузници во овој процес.
„Со надградувањето на овие ваши вештини, вие директно придонесувате за развој на емоционалната интелигенција кај учениците, што е особено важно во времето и околностите во кои живееме, како и за јакнење на критичкото мислење и интеркултурните компетенции. Со тоа, им помагате на учениците и нивните семејства да се препознаат како дел од една заедничка приказна на напредок и иновативност“, им рече Јаневска на наставниците.
Таа додаде дека годинава, преку поддршката од ОБСЕ, грантовата шема за меѓуетничка интеграција во училиштата е дополнително зајакната, а износот на грантовите е двојно зголемен.
„Доделивме вкупно 57 грантови – 39 за основни и 18 за средни училишта со кои се реализираат заеднички работилници, едукативни активности, културни и спортски настани. Ја следиме директно реализирацијата на овие проекти и задоволни сме од постигнувањата“, истакна министерката Јаневска.
Амбасадорот Килијан Вал во своето обраќање ја потенцираше улогата на наставниците, која според него, оди далеку надвор од обичното пренесување на знаења.
„Вашата улога како наставници оди далеку подалеку од пренесувањето знаења. Вие создавате училишни средини во кои се негуваат почитта, соработката и разноликоста. Преку новите знаења и практични алатки за работа со ученици од различни средини, вие сте уште подобро подготовни да создавате училишта во кои секој ученик се чувствува прифатен, почитуван и безбеден. Преку зајакнувањето на вашите компетенции за интеркултурно образование и инклузивни наставни методологии, вие сте уште подобро подготвени да им помогнете на младите луѓе да се справуваат со предизвиците на денешницата и да придонесете кон создавање побезбедни и поттикнувачки училишта. Горди сме што ја поддржуваме вашата работа, која е од суштинско значење за унапредување на квалитетот на образованието и зајакнување на општествената кохезија“, изјави амбасадорот Вал.
Обуката успешно им помогна на наставниците да развијат практични пристапи за поттикнување дијалог, решавање на конфликти и градење позитивни односи во училниците.