Шемата со „лажни лекари“ продолжува да зема жртви. Само еден ден по случајот во Штип, слична драма се одвивала и во Виница. Вчера во 17:30 часот, 77-годишен жител на градот пријавил во полиција дека бил измамен за сума од над 430.000 денари.
Кошмарот за виничанецот почнал со телефонски повик. Непознато лице му се претставило како лекар и му соопштило шокантна вест – дека неговата ќерка наводно имала тешка несреќа, скршила нога и итно ѝ е потребна операција за вградување на шипки.
Вознемирениот татко, во обид да помогне, се согласил да ја плати бараната сума. Според пријавата, тој во неколку наврати ги носел парите на договорена локација и ги предавал на измамникот. Вистината ја дознал дури откако се вратил дома и му ѕвонела неговата ќерка, која му потврдила дека е добра и дека немало никаква операција.