Полицијата трага по измамник кој успеал да му извлече дури 28.700 евра на жител од скопско, ветувајќи му лажна помош во државни институции. Жртвата ја пријавила измамата синоќа во полициската станица во СВР Скопје, посочувајќи дека измамничката шема траела со месеци.
Според полицискиот записник, оштетениот и измамникот стапиле во контакт уште кон крајот на минатата година во дуќан во Скопје, каде што осомничениот ја искористил приликата да се претстави како влијателен човек со контакти во системот кој може да заврши деликатна работа.
МВР во своето официјално соопштение во детали ја објаснува наивноста на оштетениот кој поверувал дека преку поткуп и познанства ќе успее да си го врати претходно одземениот златен накит.
„Според пријавеното, пријавителот во занаетчиски дуќан во Скопје го запознал лицето, кое му се претставило како службеник во државна институција и му кажало дека преку свои пријатели може да му помогне на пријавителот да го врати претходно запленетиот златен накит, но, за тоа морал да плати. Пријавителот му ги дал парите, но, подоцна сфатил дека бил измамен“ – информираа од Министерството за внатрешни работи.