Царинските службеници на граничниот премин Табановце спречија обид за шверц на готовински пари во износ од 500.000 евра. Оваа акција е евидентирана како најголема од ваков тип во историјата на Царинската управа, а парите биле сокриени во специјално направен простор во возило.
Првиот човек на Царината, Бобан Николовски, на прес-конференција ги соопшти деталите за тоа каде биле сокриени парите и како ќе се искористат девизите.
„Како што информира Николовски, парите се пронајдени во специјално конструиран бункер во минибус, спакувани во ќеси. Според директорот, чии се еврата ќе треба да утврдат другите надлежни институции, но извесно е дека ќе се влеат во државниот буџет и ќе се искористат за нови патишта, болници училишта,… Цариниците кои ги запленија еврата, ќе бидат наградени со по 10.000 денари.“
Николовски потврди дека за овој случај веќе има и брза судска завршница, при што го опиша и возилото со кое се превезувале патници.
„-Ова е најголема заплена досега во историјата на Царинската управа на Република Македонија. Девизите и возилото се трајно одземени, а сторителот, државјанин на Албанија, со иницијали Џ. Г., кој управувал со минибусот, е соодветно гонет, за што веќе е изречена судска пресуда од Основниот суд во Куманово. Обидот е откриен во акција на Одделението за оперативни работи на влез на државниот граничен премин Табановце, во која е извршена детална контрола на минибусот, сопственост на туристичка агенција од Албанија со која биле превезувани седум патници, рече Николовски.“
Откривањето на парите одело преку неколку филтри на контрола, почнувајќи од сомнежот на инспекторите, па сè до вклучување на куче и специјална опрема.
„Мобилниот тим веднаш забележал преправки на возилото, по што е пуштено царинското куче кое укажало на индиции за криумчарење на истото место. Сомнежите се потврдиле и со скенирање на возилото од Службата за мобилни скенери, по што инспекторите од мобилниот тим пристапиле кон отстранување на профилот во кој биле пронајдени 14 проѕирни ќеси во кои биле спакувани 500.000 евра кеш пари.“
Запленетата готовина веднаш по акцијата е дислоцирана во соодветните државни финансиски институции.
„Согласно закон, запленетите девизи уште веднаш се предадени во Агенцијата за привремено одземен имот, а потоа се депонирани во Народната банка.“
На крајот, директорот упати јавна пофалба до инспекторите и испрати порака до сите кои се обидуваат да го прекршат законот на границите.
„-Сакам јавно да се заблагодарам на тимовите од Одделението за оперативни работи за брзата реакција и школски одработената професионална контрола. Апелирам до сите, дека секој обид за нелегален прекуграничен пренос на готовина и обид за криумчарење ќе биде најстрого санкциониран од страна на царинските службеници при Царинската управа, потенцира директорот на Царината, Николовски.“