Хотел во историскиот центар на Истанбул беше целосно евакуиран откако три члена на турско-германско семејство починаа под сомнение за труење со пестициди, јавуваат турските медиуми. Семејството, кое живеело во Германија, се разболело во средата по јадење популарни специјалитети во квартот Ортакој, на брегот на Босфор.
По хоспитализацијата, починале децата на возраст од три и шест години, а во петок починала и мајката, соопшти турското Министерство за правда. Таткото, според медиумите, се наоѓа во критична состојба.
Иако првичните сомнежи биле насочени кон труење со храна – поради што ресторанот каде јаделе бил веднаш затворен – новите информации укажуваат дека пестициди биле прскани во соба на приземјето на хотелот каде што престојувало семејството. Истражителите веруваат дека штетните материи можеле да навлезат во соседните простории.
Двајца други туристи од истиот хотел биле хоспитализирани поради мачнина и повраќање.
Турските медиуми известуваат дека полицијата уапсила еден хотелски работник и двајца изведувачи за дератизација, со што бројот на уапсени лица се искачи на седум. Четворица биле приведени претходно, во рамките на истрагата за труењето.
Сите гости биле итно преместени во други хотели. Засега не е познато колку туристи директно биле погодени од инцидентот.