Грчката полиција ги истражува околностите околу смртта на бебе чие тело вчера беше пронајдено во куфер во стан изнајмен преку „Airbnb“ во атинската населба Кипсели.
Според полициски извори, на грбот на бебето се пронајдени траги за кои се сомнева дека се поврзани со кривично дело, а причините за смртта треба да ги потврди обдукцијата.
Во меѓувреме, полицијата ги истражува и околностите околу две малолетни момчиња, на возраст од 12 и 9 години, кои беа хоспитализирани откако беа пронајдени во станот. Според полициски извори, кај момчињата е утврдено дека боледуваат од сексуално преносливи болести. Во станот се пронајдени и куфери со сексуални предмети.
Од зградата е изнесен 43-годишен Грк, кој престојувал во станот заедно со 38-годишна Германка. Двојката претходно живеела во куќа на улицата Филис, која исто така е претресена под сомневање дека телото на бебето можеби било преместено отаму.
Според информациите на грчкиот портал „protothema.gr“, 43-годишниот Грк, Германката и нивната 15-годишна ќерка се очекува првично да бидат обвинети за непријавување на мртво лице. За поседување дрога се сомничат Гркот и 26-годишен Авганистанец, кој бил во врска со 15-годишната девојка.
Истражителите ги чекаат ДНК анализите и обдукцијата за да утврдат кој е родител на бебето, откако Германката тврдела дека детето е нејзино, додека полицијата утврдила дека и таа и нејзината 15-годишна ќерка се бремени. Случајот беше откриен откако управителот на имотот повикал полиција поради неплатена кирија и сомнеж за користење дрога.