Претседателот на Владата, Христијан Мицкоски, денеска ќе престојува во работна посета на компанијата „Макпрогрес“ во Виница, каде што ќе присуствува на отворањето на новата фабрика за кондиторски производи во рамки на брендот „Винчини“.
Според информациите од владината прес-служба, премиерот ќе оствари средба со менаџментот на компанијата, на која ќе се разговара за економските текови, извозните резултати, инвестициските активности и идните развојни планови на компанијата.
Во рамки на посетата е предвидена и свечена церемонија за пуштање во употреба на новата фабрика, при што Мицкоски ќе присуствува на сечењето на лентата и ќе ги разгледа новите производствени капацитети.
По завршувањето на настанот, премиерот ќе даде изјава за медиумите во кругот на фабриката.
На отворањето ќе присуствуваат и претседателот на Стопанската комора, Бранко Азески, градоначалникот на Виница, Митко Костадиновски, како и генералниот директор на „Винчини“ и потпретседател на Стопанската комора, Глигор Цветанов.
Од Стопанската комора информираат дека новата фабрика за производство на вафли е инвестиција вредна 8,5 милиони евра, реализирана за само шест месеци со значајно учество на домашни компании, инженери и изведувачи. Производствениот комплекс располага со две современи линии за производство на вафли и други кондиторски производи наменети за домашниот пазар и за извоз во повеќе од 60 земји.
Со стартот на производството се отвораат 40 нови работни места, а во текот на следната година се планираат уште 40 вработувања. Од компанијата очекуваат новата инвестиција да придонесе за зголемување на производствените капацитети за околу 30 проценти, како и за натамошно зајакнување на извозот и присуството на меѓународните пазари.