Инспекциските служби на Општина Центар заедно со Министерството за внатрешни работи излегле на терен по инцидентот на булеварот „Теодосиј Гологанов“, во близина на Католичката црква, каде е оштетена јавна површина и инфраструктура во близина на градежен зафат.
Од Општината информираат дека по извршениот увид се констатирани оштетувања на коловозот, тротоарите, канализационата мрежа и уличното осветлување, по што биле изречени санкции кон инвеститорот за непочитување на обврските.
-Поставени се сигурносни појаси и предупредувачки ленти со цел заштита на граѓаните и безбедно движење во непосредна близина на оштетениот простор. Општина Центар нема да толерира несовесно и неодговорно постапување од страна на инвеститори, особено кога се загрозува безбедноста на граѓаните и се оштетува јавниот простор. За секое прекршување ќе следуваат ригорозни мерки согласно законските надлежности – наведуваат од Општината.
Истовремено, преземени се мерки за обезбедување на локацијата, а инвеститорот е задолжен итно да го обезбеди просторот и да ја санира настанатата штета, со цел враќање на инфраструктурата во првобитна состојба.
Од МВР информираат дека при ископ на градежна локација дошло до свлечиште, при што бил затрупан багер, а оштетени се делови од тротоарот, улицата и едно паркирано возило. Случајот е пријавен до надлежните институции, а се преземаат мерки за расчистување на настанот.