Граѓаните и организациите ќе можат да предложат кои институции и области да бидат опфатени со државна ревизија во текот на 2027 година. Државниот завод за ревизија (ДЗР) започна со подготовка на годишната програма за работа и ги повикува сите заинтересирани да достават свои предлози.
Од Заводот посочуваат дека на овој начин јавноста ќе добие можност да учествува во утврдувањето на приоритетите за ревизија, особено кога станува збор за прашања од поширок јавен интерес.
Пристигнатите иницијативи ќе бидат разгледани при подготовката на програмата, а конечниот избор на ревизии ќе зависи од проценетите ризици, значењето на предложените области, професионалните стандарди и расположливите ресурси.
Предлози може да достават институции, граѓански здруженија, организации и поединци, најдоцна до 1 декември 2026 година.
Пријавувањето може да се направи електронски преку формуларот „Барање за ревизија“ на веб-страницата на ДЗР или со доставување на барање во хартиена форма на адресата на Заводот, на улицата „Павел Шатев“ бр. 2 во Скопје.
Годишната програма за работа ја донесува главниот државен ревизор, а документот најдоцна до крајот на декември ќе биде доставен до Собранието и објавен на веб-страницата на Државниот завод за ревизија.
Од ДЗР нагласуваат дека вклучувањето на јавноста треба да придонесе кон поголема транспарентност, отчетност и контрола врз управувањето со јавните пари.
Формуларот за доставување предлози е достапен на: https://dzr.mk/mk/contact/barane_za_revizija