Американскиот претприемач Илон Маск стана првиот човек во историјата чие лично богатство надмина вредност од еден билион долари.
Овој финансиски пресврт доаѓа откако неговата компанија СпејсИкс (SpaceX) собра рекордни 75 милијарди долара во иницијалната јавна понуда на акции (ИПО).
Според пресметките засновани на документите на компанијата, најголемиот дел од неговото вкупно богатство сега е концентриран токму во СпејсИкс.
Таму тој поседува удел вреден околу 866 милијарди долари, а заедно со Тесла и останатиот имот, неговиот капитал ќе надмине 1,1 билион долари по почетокот на берзанското тргување.
Експертите посочуваат дека пазарната вредност на СпејсИкс делумно се заснова на таканаречената „Илон Маск премија“, односно на довербата на пазарот во неговата способност за развој на нови технологии.
„Исто како и Тесла, СпејсИкс е облог на Илон Маск. Пазарната капитализација од 1,5 до два билиони долари сигурно би ги направила бесмислени сите традиционални методи за проценка на вредноста и најдобро може да се опише како ’Илон Маск премија‘“, рече Мет Кенеди од компанијата „Ренесанс Капитал“, која се занимава со истражување на ИПО пазарот и ЕТФ фондовите.
Побарувачката на инвеститорите, пред сè на институционалните, достигна ниво од околу четири пати поголем интерес во однос на понудениот обем на емисијата на акции.
Претходно, магазинот Форбс го процени богатството на 54-годишниот Маск на околу 780 милијарди долара, со што тој беше позициониран далеку пред второпласираниот на листата, соосновачот на Алфабет, Лари Пејџ.