Македонскиот ИКТ сектор продолжува да биде еден од најсилните двигатели на економскиот раст во земјата, со вкупни приходи од 1,77 милијарди евра и извоз од 676 милиони евра во 2025 година, покажуваат податоците презентирани на првиот македонско-грчки „Digital Bridge & Business ICT Forum“, организиран од МАСИТ и грчката асоцијација SETPE.
Анализата на состојбите во ИКТ индустријата, презентирана од Дамјан Манчевски од Управниот одбор на МАСИТ, ги опфаќа најновите показатели за растот на секторот, неговото влијание врз економијата и идните трендови.
Според податоците, во 2025 година секторот бележи раст од 7,02 отсто на приходите и 7,13 отсто на извозот во однос на претходната година. Во индустријата работат 24.134 лица во 3.367 активни компании.
Долгорочните трендови покажуваат значителен раст во периодот од 2020 до 2025 година, кога приходите се зголемиле за 80 отсто, а извозот за 193 отсто. Во истиот период, бројот на вработени пораснал за 44 отсто, а бројот на компании за 42 отсто.
Според претседателот на МАСИТ, Јордан Димитриевски, овие резултати потврдуваат дека ИКТ секторот е еден од клучните носители на економскиот развој, извозот и создавањето висококвалификувани работни места.
Анализата покажува и дека секторот учествува со околу 4,5 отсто во БДП и расте речиси двојно побрзо од вкупната економија, со стапка од 7,4 отсто во споредба со 3,8 отсто на ниво на целата економија.