По повод големиот христијански празник Велики Четврток, градоначалникот на Град Скопје, Орце Ѓорѓиевски, заедно со претседателот на Здружението за помош на бездомници, Тони Станковски, организираше хуманитарна акција во која беа поделени повеќе од 300 оброци за социјално загрозените граѓани.
Велики Четврток е ден за хуманост, ден кога сме најпотребни таму каде што болката и потребата се најголеми, напиша Ѓорѓиевски.
„Грижата за бездомните лица е мерка на човечноста на едно општество.
Токму таму каде што е најтешко, каде што недостигаат основни услови за живот, се покажува вистинската вредност на солидарноста.
Денес, заедно со Тони Станковски, претседател на Здружението на граѓани за помош на бездомни и социјално загрозени лица, поделивме повеќе од 300 оброци, носејќи барем малку топлина и грижа во нечие секојдневие.
Но, нашата посветеност не застанува тука.
Од стапувањето на мојата функција, вработивме десеттина бездомни лица кои веќе го пронајдоа својот мир и добија кров над глава – нов почеток, нова надеж.
Како градоначалник, но пред сѐ како човек, ќе го дадам и последниот атом од себе за да обезбедиме подобри услови за сите, за да има што помалку вакви судбини и што повеќе достоинствени животи.
Секој човек заслужува достоинствен празник.
А јас, заедно со мојот тим, секогаш ќе бидеме тука да подадеме рака, да донесеме надеж и да измамиме што повеќе насмевки и среќа.
Да сте ми здрави и живи!“, стои во објавата од градоначалникот Ѓорѓиевски.