Возач намерно удри со своето возило кон неколку лица на францускиот остров Олерон утринава, при што се повредени десет лица, од кои четворица се во критична состојба, јавува „Ле Парисиен“.
Инцидентот се случил околу 08:45 часот наутро, помеѓу двете села Долус Долерон и Сен-Пјер Долерон, а меѓу минувачите имало пешаци и велосипедисти.
Јавниот обвинител на Ле Рошел, Арно Ларез, информираше дека е отворена истрага за обид за убиство. Истрагата се води во повеќе правци:
Според првичните, но неофицијално потврдени информации, возачот наводно извикал „Алах Акбар“ пред да налета на лицата.
Се испитува и можноста дека станува збор за лице со ментални нарушувања.
Мажот бил приведен без отпор од жандармеријата, неколку минути по нападот, додека се обидувал да го запали своето возило.
Во автомобилот биле пронајдени боци со гас, а возилото било само делумно запалено.
Според „Ле Парисиен“, станува збор за француски државјанин во триесеттите години. Градоначалникот на Сен Пјер Долерон, Кристоф Сиер, изјави дека мажот е познат по бројни проблеми, особено по редовната употреба на дрога и алкохол.
Лицето не било во базата на податоци за спречување на радикализација и тероризам (FSPRT).
На местото на настанот е формиран тим за психолошка помош во замокот Олерон. Министерот за внатрешни работи, Лоренс Нуњез, најави дека лично ќе го посети местото на инцидентот.