Општина Центар започна со реконструкција на потпорниот ѕид во кругот на градинката „Кочо Рацин“, каде стариот и дотраен ѕид ќе биде заменет со нова армиранобетонска конструкција.
Новиот ѕид ќе биде долг 37,26 метри, со висина од 3,6 метри, а ќе има и пошироки темели од претходната конструкција, со цел да се обезбеди поголема стабилност и сигурност.
Од Општината информираат дека постојниот ѕид бил стар околу 25 години и дека изградбата на новиот се реализира според современи стандарди за квалитет и безбедност.
„И ова лето вложуваме во воспитно-образовната инфраструктура. Во моментов се работи и на поставување нова енергетски ефикасна фасада на училиштето „Кирил и Методиј“, следно е спортската сала во училиштата „Коле Неделковски“ и „Гоце Делчев“, а во тек се и санации во ООУ „Димитар Миладинов““, изјави градоначалникот на Општина Центар, Горан Герасимовски.
Проектот за изградба на новиот потпорен ѕид е вреден 5.992.394 денари, а според најавите треба да биде завршен во рок од еден месец.
Од Општина Центар велат дека инвестицијата е дел од континуираните активности за подобрување на условите во училиштата и градинките на нејзината територија.