Градоначалникот Орце Ѓорѓиевски денеска на прес-конференција соопшти дека Град Скопје презел мерки за присилна наплата на неплатениот данок на имот за 2021 година. Како резултат на оваа акција, блокирани се сметките на вкупно 17.694 физички и правни лица, а вкупниот износ на долгот изнесува 1,3 милиони евра.
Ѓорѓиевски испрати јасен апел до сите граѓани и фирми да ги подмират заостанатите обврски и за следниот период со цел да се избегнат понатамошни блокади.
„Апелирам до сите граѓани и компании во наредните 15 дена да ги подмират своите обврски по основ на данок на имот за периодот од 2022 до 2025 година“, истакна Ѓорѓиевски.
Според него, долговите од периодот 2022-2025 година се драстично поголеми. Се проценува дека 96.562 граѓани и 2.335 компании му должат на Град Скопје вкупно 19,5 милиони евра, средства кои градоначалникот ги оцени како неопходни за инфраструктурните проекти и јавните услуги.