Народната банка, во соработка со банките и другите учесници во МИПС, во текот на јули 2026 година успешно го реализираше првиот циклус на тестирање на новото системско решение. Со тестирањето е потврдена функционалноста на системот и подготвеноста за продолжување со следните фази од неговото воведување.
Во рамки на првата тест-фаза успешно биле обработени најголем дел од платежните пораки опфатени со проектот, кои се усогласени со меѓународниот стандард ISO 20022, информираат од Народната банка.
По завршувањето на тестирањето, во просториите на Народната банка бил одржан работен состанок со претставници на учесниците во МИПС, на кој биле презентирани резултатите од спроведените активности, разгледани забелешките и предизвиците што се појавиле, како и договорени следните чекори за успешна реализација на проектот.
Директорката на Дирекцијата за платни системи во Народната банка, Биљана Доновска-Гечева, посочи дека во наредниот период ќе продолжат активностите за завршување на тестирањата и подготовките за ставање на новото решение во редовна употреба.
Воведувањето на стандардот ISO 20022 претставува значаен чекор кон унапредување на националната платежна инфраструктура. Новиот систем ќе овозможи побогата и поквалитетна размена на податоци при плаќањата, поефикасна автоматска обработка на трансакциите, полесно спроведување на контролни механизми и поголема усогласеност со европските стандарди и практики.
Со примената на новиот стандард се очекува создавање услови за посигурни, поефикасни и современи платежни услуги, во согласност со европските текови и процесот на интеграција.
Проектот „Зајакнување на капацитетот на Народната банка во областа на екстерните статистики, платежната статистика и платните системи“, финансиран од Европската Унија, покрај имплементацијата на ISO 20022 во МИПС, предвидува и воспоставување на склад на податоци за потребите на екстерните статистики. Со тоа дополнително ќе се унапредат институционалните капацитети на Народната банка во овие значајни области.