Градоначалникот на Град Скопје, Орце Ѓорѓиевски, заедно со заменик-министерот за социјална политика, демографија и млади, Ѓоко Велковски, и градоначалникот на Општина Центар, Горан Герасимовски, денеска присуствуваа на прославата по повод завршувањето на образованието на штитеници од ЈУ Детски дом за деца без родители и родителска грижа „11 Октомври“.
Настанот беше организиран во чест на четворица матуранти и една полуматурантка од оваа установа, кои го заокружуваат своето досегашно школување и преминуваат во нова животна фаза.
Ѓорѓиевски преку социјалните мрежи упати порака на поддршка до младите, потенцирајќи ја важноста на заедницата и воспитувачите кои волонтерски и професионално го заменуваат семејното опкружување.
„Семејството е најголемата сила во животот на едно дете. Секое дете заслужува да расте опкружено со љубов, сигурност и топлина. Но животот понекогаш носи тешки патишта, без вина на децата. Токму затоа, огромна почит заслужуваат воспитувачите, негувателите и сите луѓе кои низ годините биле нивна поддршка, нивна сигурност, нивна рака за држење и нивно второ семејство. Љубовта што тие ја даваат е тивка, силна и безвременска“, истакна Ѓорѓиевски.
Тој додаде дека институционалната и личната грижа за овие категории на млади луѓе не смее да запре со завршувањето на самата свеченост.
„Сите деца се наши деца. А нашата грижа не завршува со еден настан, со една честитка или со една прослава. Продолжува преку дела, поддршка и цврста заложба за подобро утре и светла иднина. Ви благодарам за прекрасниот ден, за насмевките, за емоцијата и за потсетувањето дека најголемата вредност што можеме да ја дадеме е човечноста“, порача градоначалникот на Кисела Вода.