Градоначалникот на Град Скопје, Орце Ѓорѓиевски, денеска присуствуваше на регионалната министерска конференција посветена на справувањето со демографските промени и градењето отпорност. Тој истакна дека оваа тема е клучна за обликувањето на иднината на градовите и државите во регионот.
Ѓорѓиевски нагласи дека за Скопје, како главен град, иселувањето на младите и стареењето на населението не се само теоретски прашања, туку реални проблеми кои бараат конкретни политики. Според него, локалната самоуправа има клучна улога бидејќи решенијата мора да започнат таму каде што граѓаните живеат и работат.
„Во Скопје, со поддршка од Владата на Република Македонија работиме на мерки и политики што ги поддржуваат младите, семејствата и сите генерации преку подобри јавни услуги, инвестиции во образование, социјална заштита, урбан развој и создавање поинклузивни и одржливи заедници“, објави Ѓорѓиевски.
Тој потенцираше дека крајната цел е главниот град да понуди услови во кои секој граѓанин ќе има можност за достоинствен живот. Ѓорѓиевски верува дека регионалната соработка е патот кон поотпорни општества.
„Скопје останува отворен партнер, активен чинител и град кој не чека промените да се случат, туку учествува во нивното создавање. Иднината се гради со луѓето, за луѓето и за генерациите што доаѓаат“, заклучи тој.