Главниот град Скопје денеска е домаќин на 11-тиот Форум на Стратегијата на Европската Унија за Јадранско-јонскиот регион (ЕУСАИР), значаен регионален настан кој отвора простор за дијалог и размена на искуства. На настанот, покрај министерот за надворешни работи Тимчо Муцунски, како говорник се обрати и градоначалникот на Град Скопје, Орце Ѓорѓиевски.
Ѓорѓиевски во своето излагање посочи дека во време на брзи геополитички предизвици, економски притисоци и демографски трансформации, заедничкото дејствување на земјите е од клучна важност.
„Регионалната соработка не е избор, туку неопходност. Само преку заеднички, координирани и одговорни напори можеме да градиме стабилен развој, посилна економска поврзаност, подобра инфраструктурна и институционална соработка, како и поголема општествена кохезија во целиот регион“, истакна Ѓорѓиевски.
Тој појасни дека годинашниот форум е насочен кон клучните приоритети за заедничката иднина, како што се унапредувањето на спроведувањето на ревидираниот Акциски план на ЕУСАИР и зајакнување на соработката во контекст на проширувањето на Европската Унија, што го оцени како заедничка стратешка цел.
Посебен акцент во неговото обраќање беше ставен на помладата популација и демографските предизвици со кои се соочува целиот регион.
„Тие не смеат да бидат само тема на разговор, туку активни учесници, носители на идеи и двигатели на промените. Демографските предизвици бараат сериозни политики што ќе создаваат можности, ќе ги задржат младите во регионот и ќе им дадат причина својата иднина да ја градат токму тука“, дециден е тој.
Според него, прекуграничната соработка останува еден од најсилните инструменти за поврзување, додавајќи дека границите не треба да одвојуваат, туку да бидат мостови на доверба и партнерство.
„Силно сум убеден дека овој форум ќе донесе нови идеи, зајакнати партнерства и конкретни чекори што ќе ја продлабочат регионалната соработка. Нашата цел е заеднички да создадеме решенија и резултати што ќе ги почувствуваат граѓаните. Од Скопје денес, испраќаме силна порака, дека кога работиме заедно, кога градиме доверба и кога имаме заедничка визија – можеме многу повеќе“, заклучи тој.