Просторот долж кејот на реката Вардар, кој важи за едно од најпосетуваните места во Скопје за пешачење, спорт и рекреација, се уредува со поставување на нова урбана опрема, соопшти градоначалникот на Град Скопје Орце Ѓорѓиевски.
Во рамки на активностите на терен, поставени се нови клупи и корпи за отпадоци, со цел просторот да стане пофункционален и почист за сите граѓани кои секојдневно престојуваат таму, истакна Ѓорѓиевски.
„Едно од најубавите и најпосетувани места во Скопје, просторот каде илјадници скопјани секојдневно пешачат, спортуваат, се рекреираат и поминуваат време со своите семејства, го уредуваме со нова урбана опрема. Поставени се нови клупи и корпи за отпадоци, со што кејот станува попријатен, почист и пофункционален за сите граѓани. Ова беше барање на голем број жители кои секој ден го користат овој простор, а наша обврска е да одговориме со дела“, посочи Ѓорѓиевски во објавата.
Паралелно со поставувањето на новата урбана опрема, на терен продолжува и редовното одржување на пешачките зони, како и акцијата за темелно чистење на речното корито на Вардар на територијата на Град Скопје.
„Истовремено, продолжува редовното одржување на кејот, како и акцијата за чистење на коритото на реката Вардар на територија на Град Скопје. Чекор по чекор, го уредуваме градот онака како што заслужуваат скопјани. Скопје се сака со дела. Скопјани заслужуваат!“, стои во објавата од Ѓорѓиевски.