Градоначалникот на Скопје, Орце Ѓорѓиевски, денеска информираше дека Град Скопје бележи историски најдобар прв квартал во делот на капиталните инвестиции. Според неговите податоци, во првите три месеци се реализирани 335,75 милиони денари, што претставува 18,12% од вкупно планираните средства за оваа намена во 2026 година.
Ѓорѓиевски истакна дека во април реализацијата достигнала 464,45 милиони денари, што е највисок износ за овој месец досега.
„Заклучно со 8 мај 2026 година, односно за период од само 4 месеци и 8 дена, реализацијата на капиталните инвестиции изнесува повеќе од 480 милиони денари, со што веќе се реализирани 26% од вкупно планираните капитални инвестиции. Тоа значи дека за само четири месеци веќе сме надминале цели шестмесечни периоди од претходни години“, појасни градоначалникот.
Тој додаде дека паралелно со инвестициите, исплатени се сите заостанати субвенции за велосипеди, инвертер-клими и стипендии, а обезбедени се и 467,9 милиони денари за стабилизација на јавните претпријатија.
„За само 4,5 месеци, обврските на јавните претпријатија се намалени за околу 38,5 милиони евра. Предводник во ова намалување е ЈП ‘Водовод и канализација’, каде што обврските се намалени за 1,55 милијарди денари, односно повеќе од 25 милиони евра“, истакна Ѓорѓиевски, додавајќи дека долговите на самиот Град се намалени за 11,6 милиони евра.
Ѓорѓиевски заклучи дека системот се стабилизира, платите во претпријатијата веќе не доцнат и дека градот продолжува со засилено темпо на работа.