Градоначалникот на Општина Центар, Горан Герасимовски, вечерва беше гостин во студиото на Дневникот на Сител телевизија, каде информираше за состојбата по инцидентот на булеварот „Теодосиј Гологанов“, во близина на Католичката црква, каде беше евидентирано свлечиште и оштетување на јавна површина и инфраструктура во непосредна близина на градежен зафат.
Герасимовски истакна дека веднаш по инцидентот свикал итен кризен состанок, на кој присуствувале деканот на Градежниот факултет, претставници од Државниот инспекторат за труд, инвеститорите, инспекциските служби на Општина Центар и стручни лица од надлежните служби, со цел итно координирање на активностите и преземање мерки за заштита на граѓаните.
Тој упати голема благодарност до деканот и стручниот тим на Градежниот факултет, кои веднаш излегле на терен и помогнале со стручно мислење, експертска анализа и конкретни насоки за надминување на состојбата и спречување на дополнителни ризици.
„Сакам јавно да упатам благодарност до деканот и стручниот тим на Градежниот факултет, кои веднаш ни излегоа во пресрет и излегоа на терен. Во вакви ситуации, експертското мислење е клучно за носење брзи и одговорни одлуки и токму затоа веднаш постапивме по нивните насоки“, истакна Герасимовски.
Градоначалникот информираше дека во текот на денешниот ден до Општина Центар официјално бил доставен извештајот, односно стручните насоки и мислење од Градежниот факултет, по кои веднаш е постапено.
Согласно добиените препораки, Општина Центар изготвила и доставила решение за итно затрупување и обезбедување на градилиштето, со цел стабилизација на теренот, намалување на ризиците и заштита на безбедноста на граѓаните и околните станбени објекти.
При инспекцискиот надзор, како што посочи Герасимовски, биле констатирани сериозни неправилности во изведбата на градежните активности, при што било утврдено дека дел од работите не биле изведувани согласно одобрението за градење издадено од Општина Центар.
„Нашите инспектори веќе изрекоа повеќе санкции, а постапките против инвеститорот и изведувачот продолжуваат. Нема да дозволиме несовесно, неодговорно и небезбедно градење во Центар. Најстрого ќе бидат санкционирани сите што не постапуваат согласно законите и ја загрозуваат безбедноста на граѓаните“, нагласи Герасимовски.
Тој посочи дека Општина Центар ќе продолжи со санкционирање на инвеститорот и изведувачот, како и со преземање на сите законски механизми за утврдување одговорност, бидејќи, како што рече, недозволиво е да се гради спротивно на одобрението за градење и притоа да се доведуваат во ризик јавната безбедност и инфраструктурата.
Општина Центар останува на терен и будно ќе ја следи состојбата сè до целосно отстранување на ризиците, санација на штетите и обезбедување целосна безбедност на граѓаните.