Новиот Детален урбанистички план за „Барутана“ значително го намалува обемот на градење и воведува строги правила за заштита на просторот на Водно, истакна градоначалникот на Општина Центар, Горан Герасимовски, во интервју за Канал 5.
Тој ги отфрли обвинувањата за можни ерозии на теренот, посочувајќи дека планот се базира врз стручни физибилити студии.
„ДУП-от е дете на ГУП-от, кој е донесен со параметри што важат и денес. ГУП-от се темели на стручни проценки, снимања и анализи на теренот, вклучително и оние за ерозивноста“, изјави Герасимовски.
Градоначалникот нагласи дека токму непланското градење претставува ризик за појава на свлечишта, а не урбанистичкото уредување.
„Свлечиштата најчесто се резултат на непланска и самоволна градба. Со овој ДУП воведуваме ред наместо такви практики,“ додаде тој.
Според предложениот нацрт-план, вкупната површина за градење се намалува од 43.429 м² на 29.459 м², максималната изграденост се ограничува на 40 проценти, а зелените површини исто така се зголемуваат на 40 проценти. Се дозволува градење на само едно подземно ниво.
„Нема да има изигрувања како во случајот со ‘Панорамика’, каде се градеа повеќе лажни подземни нивоа. Со овој план се дозволува само едно подземно ниво за паркирање, со што се гарантира дека такви злоупотреби нема да се повторат“, истакна Герасимовски.
Тој додаде дека за планот веќе се консултирани повеќе експерти од областа на архитектурата и урбанизмот.
„Имавме консултации со стручни лица и градежници, денеска се сретнав со професорот и екс градоначалник Грчев. Тој укажа дека многу нестручни лица си даваат слобода да коментираат без елементарно познавање на материјата“, рече градоначалникот.
Герасимовски повтори дека градежните парцели не се зголемени, туку се преземени од претходното планско решение.
„Се создаде непотребна фама. Ова не е нов план, туку ДУП кој постои од 2002 година. Ние не го зголемуваме обемот на градење, туку го уредуваме просторот и воведуваме јасни правила“, истакна тој.