Општина Центар објави јавен повик за доделување еднократна парична помош за физичките и правните лица кои претрпеа материјални штети од неодамнешното силно невреме, информираше градоначалникот Горан Герасимовски во гостувањето во емисијата „Вести плус“ на Канал 5.
Герасимовски посочи дека по невремето сите општински служби веднаш биле мобилизирани за расчистување на теренот.
„Веднаш по невремето излеговме на терен и веднаш го свикавме Кризниот штаб. Од првиот момент сите служби беа целосно мобилизирани и се работеше деноноќно. Благодарен сум на сите вработени и служби кои со огромна посветеност работеа на расчистување на последиците и обезбедување на безбедноста на граѓаните“, истакна Герасимовски.
Тој појасни дека општинските екипи првенствено реагирале на најкритичните точки во општината.
„Отстранувавме опасни лимови, расчистувавме паднати дрвја, интервениравме со механизација на повеќе локации и постојано ги следевме приоритетите на терен. Најважно ни беше да ја обезбедиме безбедноста на граѓаните и што побрзо да ја нормализираме состојбата“, рече Герасимовски.
Во однос на финансиската поддршка за оштетените објекти, тој објасни дека аплицирањето ќе трае во следните два месеци.
„Јавниот повик ќе трае два месеци. Право да аплицираат имаат физички и правни лица кои имаат недвижен имот на територијата на Општина Центар, а кои претрпеле штети на кровни конструкции и фасади. Формиравме комисија составена од претставници на Советот и општинската администрација, со цел постапката да биде целосно транспарентна и објективна“, нагласи Герасимовски.
Првиот човек на Центар ги повика сите засегнати жители да ги достават своите барања според насоките објавени на официјалната веб-страница на општината.
„Нашата обврска не завршува со расчистувањето на последиците. Продолжуваме да им помагаме на граѓаните и преку институционална и финансиска поддршка, затоа што во вакви ситуации најважни се брзата реакција, солидарноста и грижата за секој граѓанин“, порача Герасимовски.