Наместо да се јави во затворот во Идризово, каде од денеска треба да ја започне десетгодишната затворска казна за автобуската несреќа кај Ласкарци, сопственикот на „Дурмо турс“, Дурмиш Белули, заминал на операција во тетовската болница. Ова за „Вечер“ го потврди судијата за извршување санкции од Гостивар, кој лично отишол во болницата за да провери дали навистина е закажана интервенцијата.
„Докторот ме увери дека по пациентката која е закажана пред него, Белули е следен за операција,“ изјави судијата. Тој по трет пат го одложува влегувањето во затвор на Белули – прво поради операција на кила на едниот тестис, потоа поради компликации, а сега поради хируршки зафат на другиот тестис. Според него, постои медицинска документација и законска основа за ново одложување.
„Санкцијата се одложува за 15 дена, иако беше побарано 20 до 30 дена опоравување,“ додаде судијата. На прашањето дали постои ризик Белули да избега, како што тоа го направи управителот на возниот парк на „Дурмо турс“, Ремзи Мифтари – кој исто така одложуваше поради идентична операција и сега е недостапен – судијата одговори дека за тоа е надлежна полицијата.
И Белули и Мифтари имаат правосилни пресуди од 9 мај годинава за трагедијата во која загинаа 16 лица, а уште 30 беа повредени. Апелациониот суд тогаш ја зголеми казната на Белули од четири на десет години затвор, а на Мифтари – од шест на десет години. Двајцата сè уште не се јавиле на издржување на казната.