Претседателот на Собранието, Африм Гаши, во гостување на МРТ се осврна на динамиката и процедуралните опструкции за време на седниците за пратенички прашања, како и на прашањата поврзани со употребата на албанскиот јазик во законодавниот дом.
Гаши истакна дека координациите и честите паузи за време на седница за пратенички прашања не се вообичаена практика, посочувајќи дека процедуралните обраќања сè почесто се користат за политички блокади наместо за заштита на деловникот.
Тој појасни дека деловничката можност за процедурално обраќање е замислена како механизам преку кој координаторите и пратениците ќе укажат на евентуално прекршување на Деловникот.
„За жал, тој механизам веќе станува политички инструмент и се злоупотребува. Ќе треба да најдеме начин да го заокружиме во смислата во која е содржана во Деловникот – координаторите да го користат секогаш кога сакаат да укажат на процедура, а не за искажување политички ставови или за блокирање на седниците“, порача Гаши.
Претседателот на Собранието подвлече дека денот за пратенички прашања му припаѓа првенствено на опозицијата за вршење надзорна функција, упатувајќи апел наместо трошење време со чести паузи, фокусот да биде врз директното испитување на владините политики.
Одговарајќи на прашањата за наводите дека одредени акти на албански јазик немале негов потпис, Гаши ги демантираше таквите тврдења.
„Не, спротивно е тоа. Во Собранието албанскиот јазик се почитува максимално, точно онака како што е предвидено со Законот“, заклучи претседателот на Собранието.
Последната седница за пратенички прашања заврши предвреме откако координаторот на пратеничката група на ЗНАМ, Бобан Карапејовски, побара едночасовна пауза поради злоупотреба на процедуралните забелешки. Поради тоа, потпретседателката на Собранието, Весна Бендевска, констатираше дека паузата го надминува редовното работно време до 18 часот и официјално ја затвори седницата.