Судскиот процес за трагедијата во дискотеката „Пулс“ во Кочани, во која животот го загубија 63 лица, а преку 230 беа повредени, сè повеќе се претвора во извор на фрустрација за семејствата на жртвите. Додека правдата се чека, рочиштата се одвиваат со крајно бавно темпо – често со сослушување на само еден или двајца сведоци, а дел од повиканите воопшто не се појавуваат пред судот.
Денешното рочиште беше обележано со сведочењето на Теа Ѓоргиева, која со вознемирувачка јасност ја опиша атмосферата пред и за време на пожарот. Таа посочи на опасната близина на пиротехничките средства до гостите, што во првите моменти предизвикало само шега кај присутните, но набрзо прераснало во трагедија.
„Гужвата беше огромна. Во еден момент паднав и останав заглавена. Мирисот беше тежок, кисел, неприроден. Слушав експлозии зад мене“, раскажа Ѓоргиева, додавајќи дека нејзиното спасување го должи на член од обезбедувањето.
Нејзиното сведочење ги потврди сомнежите на обвинителството за употребата на леснозапаливи и токсични материјали во објектот, што во комбинација со пренатрупаноста (над 600 продадени билети) и блокираните излези, се покажа како кобно.
Незадоволството на семејствата на жртвите станува сè повидливо. Тие се чувствуваат изневерени од бавноста на постапката, особено кога се соочени со непотребни пролонгирања, како претходниот случај кога првообвинетиот Дејан Јованов – „газда Деко“ побара медицинска помош, со што судењето се одложи за 90 минути.
За наредното рочиште е најавено читање на обдукциските извештаи, што ќе биде нов тежок момент за семејствата кои бараат брза и ефикасна правда.