Актерот Кирил Поп Христов познат како Кили, почина на 58.годишна возраст во Еквадор, каде живееше од 2014 година. Кили починал во сон од инфаркт.
Една од неговите последни објави на социјалната мрежа Фејсбук е од Декември, 2025 година.
-„На 2. 12. 2004.. на крајот на светот каде што е ‘Ртот на добрата надеж’ (Cape of the good hope- Кептаун го добива името по него), со овој Ангел прекрасен го доживеав најубавиот ден во мојот живот.. се уште нешто НЕ го засенило. Никогаш повторно НЕ се појави ни приближно слично, искрено, топло, несебично пријателство. Со него се чувствував како кондорски крилја да ми беа наметнати, но никако в наши страни не сакав да прелетнам. За жал се има свој крај.. проклето нека е! Неговиот дојде по само пет месеци. А.. случајно му беше на овој датум роденден“. „Никогаш не ќе те заборавам мој Муки“, напиша Кили во објавата.
Неговата сопруга, кореографката Гордана Деан-Поп Христова, за ЦрноБело изјавила дека тој починал во сон од инфаркт и дека таа ќе го памети само по убавите моменти поминати заедно.
Кили е роден на 30 јули 1967 година во Скопје. Дипломирал на Факултетот за драмски уметности во Скопје, на отсекот Актерска игра, во класата на професорот Љубиша Георгиевски во 1989 година. Од 1993 година работел во Македонски народен театар во Скопје.
Познат е по улогите во Тетовирање, Македонска Сага, Пикасо и Трст виа Скопје.
Кили останува запаметен како еден од значајните македонски актери на својата генерација, со бројни улоги кои го одбележаа театарското и филмското наследство во земјата.
Нека почива во мир. Сочувство до семејството.